Noency Mosquera & El Bongo de Bojayá
Fargerike rytmar frå Colombia
Talet på internflyktningar i Colombia er høgare enn i noko anna land, med unntak av Syria, noko som skuldast at dei har ei av dei mest langvarige konfliktane i verda gåande i landet. Geriljagrupper og paramilitære bandar har jaga heile landsbyar på flukt. Ei av dei som måtte flykte, er Noency Mosquera. 6 år gamal slapp ho unna då paramilitære i 2002 drap 119 sivile i landsbyen hennar, Bojayá.
I vaksen alder har Noency Mosquera stått på barrikadane og kjempa afro-colombianarane si sak i Colombia; ho kjempa for å få tilbake landsbyen sin. For å få bygge den opp igjen. Og ho har gjort det med song og musikk; gjennom tekstar og ved å stå opp for ein kultur colombianske styremakter ikkje såg verdien i.
Trass den dystre bakgrunnen, er det framfor alt fargar og rytmar som dominerer når Noency Mosquera & El Bongo de Bojayá byr på sitt store og varierte repertoar frå Colombias Stillehavskyst: tamborito, porro, cumbia, chirimía og son chocoano; dette er musikk som gjer at du aller helst vil danse berføtt og nyte livet. Og kvifor ikkje?
Noency Mosquera Martínez - vokal
Rock Lludson Montealegreio - klarinett (requinta)
Iván Darío Rodríguez Posada – cymbalar (platillos)
Yiser Lozano Urrutia - Tambora (tromme)
José Elin Mosquera Castillo – klarinett, cymbalar (patillos)