Bornas Verdsdag Førde
Kvart år i november arrangerer Førdefestivalen ein familiedag med gratis mini-verkstadar i musikk, dans og song, i tillegg til gratis aktivitetar og den internasjonale kafeen Fargerike Førde.
Verkstadane vert leia av profesjonelle instruktørar og representerer mange ulike kulturar. Sjølve grunntanken er ‘oppleving gjennom deltaking’. Det betyr at born i alle aldrar skal få prøve seg på til dømes flamenco og capoeira, ulike rytmeinstrument, trekkspel, fele, lære nye songar og songdansar eller høyre eventyr. Det er inga påmelding, og verkstadane går fleire gonger ut over dagen for at borna skal rekke å vere med på alle. Verkstadane vert dekorerte, slik at borna skal få ei slags kjensle av å vere i landet der den aktuelle dansen og musikken kjem frå.
Gratisfestivalen har Førdehuset som arena, og arrangementet vert gjennomført i samarbeid med Sunnfjord kommune.
Bornas Verdsdag Førde vart første gong arrangert i 2010. Konseptet vart starta av Rikskonsertane i 1999, men vert no arrangert fleire stadar i landet.
Skroll ned og sjå videoar frå tidlegare Bornas Verdsdag-arrangement i Førde - og klikk på knappen for å finne informasjon om årets arrangement.