KOKK HEIM-premien sikra dobbeltfeiring for Kjersti
Kokkane Thomas Holme Smådal og Bodil erdalsdal laga festmiddag for kjersti i Førde. Foto: Arve Ullebø
Ho hadde alt planlagt feiringa av sin neste runde bursdag i september, men takka vere ein gjev premie på Førdefestivalen sin festivalfrukost laurdag 9. juli i år, kunne jubilanteninvitere sine aller næraste vener til ei ekstra feiring på sjølve dagen. Og det utan at det kosta ho verken arbeid eller ekstra kroner!
Kjersti Veiteberg Eide vart nemleg den heldige vinnaren av Kokkenes Meisterlaug Sogn og Fjordane sin KOKK HEIM-gevinst på årets festival: Ein tre-retters festmiddag for inntil 8 personar.
Tekst: Torill Faleide | Alle foto: Arve Ullebø
-Sidan eg alt hadde bestemt og invitert gjester i samband med bursdagen, måtte eg sjølvsagt tenkje meg litt om då eg vann denne spesielle premien, fortel ho, men då ideen om å invitere vener til festmiddag til festmiddag som ei ekstrafeiring på sjølve dagen, var ho glad for at det let seg gjere for kokkane.
“ - Sjølv om eg er glad i å lage mat, er det jo rett og slett fantastisk kjekt å få alt servert på eit fat på denne måten, bokstaveleg tala, seier Kjersti. ”
Det einaste hovudpersonen har gjort er å invitere gjestene – og rydde huset. Ja, og så ta stilling til menyen som kokk Thomas Holme Smådal kom med. (meny og oppskrifter står under artikkelen) -Og sjølv om eg er glad i å lage mat, er det jo rett og slett fantastisk kjekt å få alt servert på eit fat på denne måten, bokstaveleg tala, seier Kjersti, i det ho slepper kokkane Thomas Holme Smådal og Bodil Erdalsdal inn på kjøkkenet med alle sine remedier – og råvarer til kveldens selskap. Råvarer som denne kvelden var sponsa av Coop Extra i Førde.
Thomas tok ein sjanse
Thomas Holme Smådal kjem frå Naustdal, og seier sjølv at det er ganske tilfeldig at han hamna i kokkeyrket. -Eg tok ein sjanse!, seier han. -Eg var veldig glad i å bake, men eigentleg ikkje så oppteken av matlaging. Då eg skulle velje retning etter ungdomsskulen i Naustdal, vart det meir eller mindre å ta sjansen på kokkelinja på Mo- og Øyrane vgs.
Den unge kokkespiren kom seg fint gjennom åra på vidaregåande, og sidan fekk han lærlingplass på Gloppen Hotell på Sandane. Fagbrevet fekk han i vår, og for tida arbeider han som kokk på kafeen Ferske Smakar på Amfi Førde. I tillegg til arbeide som kokk både på kafeen i Førde og mellom anna ved Åmot Operagard, er han konditorlærling. Lærlingjobben er eigentleg hovudsysselen, og han tek sikte på å ha fagbrev nummer to på plass i løpet av eit par år. Kvar vegen går etter det, er det ingen som veit, men at det vil handle om mat også i framtida, er ikkje 22-åringen frå Naustdal i tvil om.
“Kvar vegen går etter det, er det ingen som veit, men at det vil handle om mat også i framtida, er ikkje 22-åringen frå Naustdal i tvil om.”
Matlaging som yrke
Med seg denne kvelden hadde han lærar på linja for restaurant og matfag på Mo og Øyrane vgs i Førde, Bodil Erdalsdal. Ho er også ein av leiarane (oldermann)i Kokkenes Mesterlaug Sogn og Fjordane, som gjennom heile året marknadsfører kokkeyrket ved å delta på ulike arrangement både i og utanfor fylket. Kokkkelauget har sidan 2003 vore med å gjennomføre festivalfrukosten kvar laurdagsmorgon på Førdefestivalen. -Det er eit av dei største arrangementet vi har ansvaret for i fylket, fortel Bodil, og her legg vi ned ein god del arbeidstimar både i førebuing og gjennomføring. Og alt vert gjort på dugnad.
-Yrket som kokk gjev ein actionfylt arbeidsdag, tempoet er alltid høgt og ingen dager er like. Mat er noko vi alle har felles, det interesserer alle! Noko av det kjekkaste som skjer i løpet av ein arbeidsdag er det som kallast service, altså augneblinken når ein serverer maten til gjestane, seier Bodil. Ho kjenner seg heldig som har matlaging til yrke.
Fakta
Her kan du lese meir om linja for restaurant og matfag fag på Mo og Øyrane vgs i Førde.
Kokkenes Meisterlaug Sogn og Fjordane er ein del av Norges Kokkemesteres landsforening, partipolitisk uavhengig organisasjon som arbeider for å fremme kokkefaget og utvikle Det norske kjøkken. Dei har 53 medlemer, er med på ca 8 arrangement i året i tillegg til 5-6 kurs for lærlinger, lærlingkonkurranse uttak til Norgescup, stand med markedsføring/rekruttering og fleire fagturar. Det er andre gong lauget loddar ut KOKK HEIM. Første gong var i samband med festivalfrukosten på Førdefestivalen i 2012
Her kan du lese meir om Norges Kokkemesteres landsforening.
Under finn du menyen for den vellukka bursdagsfeiringa i Førde. Kjersti fortel at maten smakte verkeleg godt, og at graskarsuppa kanskje var den som fekk aller mest skryt! Skroll ned, så finn du oppskrifta og kan prøve sjølv.
Kveldens meny
Graskarsuppe
Kuvertbrød og ramslauksmør
Fylt kjelår frå Kandalen
Krema kål og bakon
Raubet og gulrot
Sjysaus
Hasselbackpotet
Norske plommer
Vaniljeiskrem
Oppskrifter på forrett og dessert:
Graskarsuppe
2 stk butternut graskar
2 stk gulrot
3 stk sjalottlauk
2 fedd kvitlauk
1 neve urter (t.d. basilikum, timian, persille)
2 ss meierismør
1,5-2 liter vatn
1 beger creme fraiche
Reinsk og kutt grønsaker i grove bitar. Varm opp ein kjele og tilsett smøret. Fres grønsakene eit par minutt
under lokk, deretter tilsett 1,5 liter vatn. La det heile koke i 30 minutt til grønsakene er skikkeleg møre.
Bruk ein stavmiksar til å mose suppa. Tilsett creme fraiches, evt meir vatn om suppa er for tjukk.
Smak til med salt og pepar. Server med brød og smør.
Plommekompott
1 kg plommer
250 g sukker
2 dl vatn
1 kanelstong
2 kvastar mynte
2 ss potetmjøl
Sett vatn, sukker, mynte og kanelstong på kok. Fjern stein i plommene og del i fire. Når sukkerlaka koker,
tilsett plommene la dei koke under lokk i litt over eit minutt. Bruk ei holause og sil vekk plommene i ein bolle.
Bland potetmjølet med litt kaldt vatn. Gje sukkerlaka eit oppkok, trekk kjelen frå varmen og rør inn
potetmjølblandinga, viktig at den ikkje kokar heretter! Smak eventuelt sausen med meir sukker.
Hell sausen over plommene, og la dei kjøle seg ned. Server gjerne lun.
Vaniljekremis
3 dl fløyte
7 dl heilmjølk
200 g sukker
10 eggeplommer
1 vaniljestong
Kok opp fløytemjølk, sukker og vaniljestong (splitta og skrapa ut frøa). Ha eggeplommene i ein bolle
og hell over den kokande væska medan ein piskar. Den kokande væska vil no gjere at eggeplommene
tjuknar og du vil få ein vaniljesaus. Avkjøl sausen med vaniljestong, deretter fjerne den. Om du
har iskremmaskin, kan bruke den, elles må du sette bollen i frysaren og røre ein gong i blant.