Høgemo & Karlsrud

Veletablert duo med stort vestlandsrepertoar!

Når Håkon Høgemo og Tom Karlsrud legg ut på VestaFolk-turné, er det med eit rikt materiale av lokale folkemusikktradisjonar frå Vestlandet på repertoaret; folkesongar, lydarslåttar og ulike former for dansemusikk dei har arrangert seg imellom. Høgemo og Karlsrud har spelt saman sidan 90-talet, og gav i 2016 ut plata Samdrag, med fokus på slåttespelet til dei eldre danseformene, som springar, gangar og halling. Gjennom det mangeårige samspelet har duoen utvikla ein eigen måte å spele desse slåttane på – der fela og trekkspelet saumlaust vekslar om å føre melodi og vere komp.

Håkon Høgemo – hardingfele

Tom Karlsrud - trekkspel

Håkon Høgemo er førsteamanuensis ved Norges musikkhøgskule der han underviser studentane i hardingfele. Han har sidan 1993 vore frilansmusikar og spelt i mange ulike grupper: «Utla», «Bufaste tonar», «Gamaltnymalt» og «Marylands». Han har to spelemannsprisar å sjå tilbake på i tillegg til at har vunne Landskappleiken på hardingfele to gonger.

Tom Karlsrud er distriktsmusikar i folkemusikkgruppa med Lærdal kommune som arbeidsgjevar. Han har vore frilansmusikar sidan 1984 og har i tillegg til samarbeidet med Håkon spelt med m.a. «Gjertruds sigøynerorkester», «Trio Lærdal», «Herr Malkom», «Bufaste tonar» og hatt ei lang rekke konsertar saman med klarinettist Georg M. Reiss.